Hondius kruiz gəmisi 1 apreldə Argentinanı tərk edərək 23 ölkədən təxminən 150 sərnişin və heyət üzvü ilə yola düşdü. Gəmi harada dayandı? Hər ölkədən neçə sərnişin düşdü? ÜST-ə epidemiya nə vaxt bildirildi? İlk ölüm nə vaxt baş verdi?
Gündəm24.az xəbər verir ki, Dünyanın ən ucqar bölgələrindən birində başlayan sirli xəstəlik kruiz gəmisini beynəlxalq narahatlıq mərkəzinə çevirib. 23 ölkədən təxminən 150 sərnişin və heyət üzvü daşıyan “MV Hondius” gəmisi Argentinadan yola düşdükdən sonra ard-arda ölüm və hantavirus halları qeydə alınıb. ÜST hadisəni yaxından izləyir.
İlk simptomların 6 apreldə ortaya çıxdığı bildirilir. Argentinadan olan bir kişi sərnişin gəmidə xəstələnib və 11 apreldə həyatını itirib. Daha sonra gəmi Cənubi Atlantikdə yerləşən Tristan da Cunha adasına çatdıqda ikinci şübhəli yoluxma aşkarlanıb. Britaniya ordusu adaya təcili tibbi yardım göndərmək məcburiyyətində qalıb.
Marşrut boyunca vəziyyət daha da ağırlaşıb. Hantavirusdan öldüyü bildirilən sərnişinin cəsədi Müqəddəs Yelena adasında gəmidən endirilib. Onun həyat yoldaşı isə sonradan ağırlaşaraq Yohannesburqda vəfat edib. Gəmidən düşənlər arasında Türkiyə vətəndaşlarının da olduğu açıqlanıb.
ÜST mayın əvvəlində kruiz gəmisində “ciddi tənəffüs xəstəliyi” ilə bağlı xəbərdarlıq aldığını bildirib. Kabo-Verde sahillərində xəstə sərnişinlər təxliyə olunub, təsdiqlənmiş yoluxma halları xüsusi tibbi təyyarələrlə Hollandiyaya aparılıb.
Nəhayət, mayın 10-da “Hondius” Kanar adalarındakı Tenerifə çatıb və qalan sərnişinlərlə heyət ölkələrinə göndərilib. Gəmidə ümumilikdə 3 Türkiyə vətəndaşının olduğu bildirilir. Hadisə beynəlxalq səhiyyə qurumlarında ciddi narahatlıq yaradıb və virusun yayılma ehtimalı diqqətlə araşdırılır.
