Xəbər verdiyimiz kimi, Azərbaycan Prezidentinin köməkçisi – Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev “Haber Global”a açıqlamasında deyib ki, qardaş Türkiyənin maraqları Azərbaycan üçün hər zaman prioritet olub və bu məsələ bizim üçün həmişə “qırmızı xət”dir. İsraildə 1915-ci il hadisələrinin “erməni soyqırımı” kimi tanınması məsələsinə Azərbaycanın intensiv diplomatik fəaliyyətə başlaması Türkiyə mediasında da rəğbətlə qarşılanıb.
Pravda.az-a açıqlama verən Azərbaycan-Türkiyə parlamentlərarası əlaqələr üzrə işçi qrupunun üzvü Fazil Mustafanın sözlərinə görə, bu addım bütövlükdə yanlız Türkiyənin marağı kimi xarakterizə oluna bilməz.
F.Mustafa bildirib ki, bu, həm də Azərbaycanın öz marağıdır: “Çünki erməni genosidinin tanınması informasiya mübarizəsində bizə də zərər vuran çox ciddi istiqamətlərdən biridir. Ona görə də indiyə qədər də bu mübarizəni aparırıq. Eyni qaydada dəstəyi “Xocalıya ədalət” kampaniyasında da Türkiyədən yüksək səviyyədə gördük. Ona görə də bütün platformalarda Türkiyəyə qarşı yönəlmiş ittihamların Azərbaycana da aid olduğunu onsuzda hamımız qəbul edirik və bir yerdə də bu addımları atırıq. Azərbaycan hökumətinin ayrı-ayrı vasitələrlə də olsa, İsraildə bu məsələnin müzakirəsinə təsir göstərməsi Türkiyə tərəfindən təqdirlə qarşılandı. Azərbaycanın etdiyi fədakarlıq qardaşa edilən fədakarlıq idi. Ona görə də bizdə bunun hansısa bir qiymətləndirilməsi əslində düzgün də deyil. Çünki Türkiyə də bu addımı atmağı özünün bir borcu hesab edir. Biz ona borc kimi baxırıq”.
Deputat vurğulayıb ki, Azərbaycanın belə bir mövzuda həssaslıq göstərməsi öz qardaşlıq borcuna olan münasibətini ortaya qoyur: “Həm də sözünün bütövlüyünə dəlalət edən bir davranışdır. Biz bundan sonrakı dövrlərdə də bir-birimizin maraq və mənafeyini istənilən platformada qorumağa davam edəcəyik. Bu durum hamımızı birlikdə mövzu ətrafında, xüsusilə də erməni tezisləri ətrafında bizə qarşı yönəlmiş kampaniyaları durdurmağa, müəyyən dərəcədə səyləri birləşdirməyimizə stimul yaradacaq. Yəni indi əslində Ermənistan dövlətindən daha çox kənar qüvvələr bu ad altında münasibətləri gərginləşdirməyə çalışırlar. Biz buna bütün hallarda müəyyən dərəcədə dirənişimizi göstərməliyik, sərt mövqeyimizi bütün platformalarda ifadə etməliyik. Yəni hər hansı bir erməni soyqırımının olmadığı tarixi mənbələrlə təsdiq olunubsa, bunu siyasi təzyiqlərlə qəbul etdirmək fayda verməyəcək”.
