Rusiya Xarici İşlər Nazirliyi Ermənistanı narahat edən Cənubi Qafqaz Dəmir Yolunun (CQDY) konsessiyası ilə bağlı bütün məsələlərə aydınlıq gətirildiyini açıqlayıb.
KONKRET.az xəbər verir ki, bunu TASS-a müsahibəsində Rusiya XİN-in MDB ölkələri üzrə dördüncü departamentinin direktoru Mixail Kaluqin bildirib.
Onun sözlərinə görə, məsələ aprelin 1-də Rusiya və Ermənistan liderləri arasında keçirilən danışıqlarda ətraflı müzakirə olunub.
“Ermənistan tərəfini narahat edən bütün məqamlara dair izahat verildi. Regional kommunikasiyaların açılmasında Rusiya tərəfinin iştirakı da daxil olmaqla, gələcək fəaliyyət formatı üzrə anlaşma əldə edildi”, – deyə Kaluqin vurğulayıb.
Rusiyalı diplomat qeyd edib ki, Moskva Ermənistanın Baş naziri Nikol Paşinyanın “CQDY ilə bağlı məsələlərin Rusiyanın arxasınca müzakirə olunmayacağı” barədə açıqlamasını da diqqətdə saxlayıb.
Rusiya XİN-i həmçinin Ermənistan dəmir yollarının Rusiya şirkəti tərəfindən idarə olunmasının ölkənin rəqabət üstünlüklərini məhdudlaşdırdığı barədə fikirlərlə razılaşmayıb.
“Əksinə, hesab edirik ki, bu idarəetmə Ermənistan üçün əlavə imkanlar yaradır. Əgər Rusiya tərəfinin dəmir yolu şəbəkəsinin bərpası və fəaliyyətinin qorunması istiqamətində apardığı uzunmüddətli işlər olmasaydı, bu gün Ermənistanın Cənubi Qafqazda nəqliyyat arteriyalarının yenidən işə salınmasında iştirak perspektivlərindən danışmaq daha çətin olardı”, – deyə diplomat bildirib.
Kaluqin əlavə edib ki, Rusiya ilə Ermənistan arasında ölkənin təhlükəsizliyini təmin edən bir sıra müqavilələr mövcuddur və bu sistemdə Kollektiv Təhlükəsizlik Müqaviləsi Təşkilatı mühüm rol oynayır.
Onun sözlərinə görə, Ermənistanın təşkilatdakı üzvlüyünü “dondurması” Rusiyanın öhdəliklərini dəyişmir.
Diplomat bildirib ki, Rusiya uzun illərdir Ermənistanın təhlükəsizliyi və sabitliyinin təmin olunmasında real rol oynayır.
