Fransanı əhatə edən həddindən artıq istilər səbəbindən 8 əyalətdə xəbərdarlıq səviyyəsi “narıncı” səviyyəyə qaldırılıb.
Gündəm24.az xəbər verir ki, Fransada son günlər təsirini artıran həddindən artıq isti hava həyatı iflic etməyə başlayıb. Ölkənin meteorologiya xidməti Meteo France qeyri-adi yüksək temperatur səbəbindən səkkiz əyalətdə xəbərdarlıq səviyyəsini “narıncı” mərhələyə yüksəldib. Bəzi bölgələrdə havanın temperaturunun 36 dərəcəyə çatdığı bildirilib.
Fransa hökumətinin sözçüsü Maud Bregeon TF1 kanalına açıqlamasında isti hava ilə əlaqədar faciəvi hadisələrin baş verdiyini deyib. Onun sözlərinə görə, açıq havada keçirilən idman tədbirləri zamanı iki nəfər həyatını itirib, daha beş nəfər isə suda sərinləməyə çalışarkən boğularaq ölüb. Beləliklə, ölkədə istilərlə əlaqəli ölənlərin sayı yeddiyə yüksəlib.
Fransanın idman və gənclər naziri Marina Ferrari isə RMC kanalına açıqlamasında hava şəraitinin daha da pisləşəcəyi təqdirdə yaxın günlərdə bəzi idman tədbirlərinin ləğv oluna biləcəyini bildirib.
İsti hava nəqliyyat sisteminə də ciddi təsir göstərib. Parisdən Nitsaya hərəkət edən sərnişin qatarı elektrik kəsilməsi səbəbindən təxminən dörd saat yolda qalıb. Kondisioner sisteminin işləməməsi səbəbindən sərnişinlər vaqonlardan təxliyə edilib.
Sədaqət Həsənova
