Vyetnam Prezidenti To Lam Rusiya Prezidenti Vladimir Putini ölkəsinə rəsmi səfərə dəvət edib. Moskvada keçirilən yüksək səviyyəli dəniz məsləhətləşmələri zamanı Baş nazirin müavini Phan Van Giang vasitəsilə Rusiya Prezidentinin müşaviri Nikolay Patruşevə çatdırılan bu dəvət iki ölkə arasında strateji tərəfdaşlığı gücləndirəcək.
Gündəm24.az xəbər verir ki, Moskva və Hanoy arasında diqqətçəkən diplomatik yaxınlaşma baş verir. Rusiyada keçirilən Rusiya-Vyetnam dəniz məsləhətləşmələri zamanı Vyetnam Baş nazirinin müavini Phan Van Giang Prezident Vladimir Putinə rəsmi səfər dəvətini çatdırıb. Dəvətin Vyetnam Prezidenti To Lam adından təqdim edilməsi iki ölkə arasındakı strateji münasibətlərin daha da gücləndiyini göstərib.
Phan Van Giang bildirib ki, Prezident To Lam Putini bu il Vyetnama rəsmi səfərə dəvət edir. Rusiya Prezidentinin müşaviri Nikolay Patruşev isə bu addımı yüksək qiymətləndirərək Hanoya təşəkkür edib və Giangı yeni vəzifəsi münasibətilə təbrik edib.
Kremlin Asiya-Sakit Okean bölgəsində ən yaxın tərəfdaşlarından biri hesab edilən Vyetnamla münasibətlərin yeni mərhələyə keçdiyi vurğulanır. Gözlənilən Putin səfərinin xüsusilə Cənubi Çin dənizində təhlükəsizlik balansı, enerji marşrutları və regional geosiyasət baxımından mühüm nəticələr doğura biləcəyi qeyd olunur.
Sədaqət Həsənova
