Rusiya tərəfi İranın qanuni hüquqlarına hörmətlə yanaşılaraq ədalətli siyasi və diplomatik həllərə nail olmağa yönəlmiş diplomatik prosesi dəstəklədiyini bir daha təsdiqlədi.
Gündəm24.az xəbər verir ki, TASS agentliyinin məlumatına görə, Rusiya Xarici İşlər Nazirliyi telefon danışığından sonra yaydığı açıqlamada bildirib ki, Rusiyanın xarici işlər naziri Sergey Lavrov və İranın xarici işlər naziri Abbas Əraqçi İranın nüvə proqramı ilə bağlı mövcud vəziyyəti müzakirə ediblər. Tərəflər, həmçinin Cenevrədə keçirilən son ABŞ-İran dolayı danışıqlarının nəticələrini nəzərdən keçiriblər.
Nazirliyin Telegram kanalında qeyd olunub ki, görüş zamanı İranın nüvə fəaliyyəti ətrafında baş verən son inkişaflar barədə fikir mübadiləsi aparılıb. Rusiya tərəfi Nüvə Silahlarının Yayılmaması haqqında Müqavilənin prinsiplərinə uyğun şəkildə İranın qanuni hüquqlarına hörmət göstərilməsinin vacibliyini vurğulayıb və ədalətli siyasi-diplomatik həllin dəstəkləndiyini bir daha bəyan edib.
Bundan əlavə, Lavrov və Əraqçi qarşılıqlı maraq doğuran konkret ikitərəfli məsələləri də müzakirə ediblər. Məlumata görə, telefon danışığı İran tərəfinin təşəbbüsü ilə baş tutub.
Sədaqət Həsənova
