Azərbaycanın toy biznesində son zamanlar tətbiq edilən kreativ yeniliklər cəmiyyətdə geniş müzakirələrə səbəb olub. Bu xidmətlər arasında xüsusilə “Bəyin dostu” xidməti həm orijinallığı, həm də qiyməti ilə diqqət çəkir. Belə ki, toy məclisini daha rəngarəng etmək istəyən bəylər, hər bir nəfər üçün 150 manat ödəməklə peşəkar “dostlar” sifariş edə bilirlər.
Mövzu ilə bağlı Oxu24.com-a açıqlama verən sosioloq Naib Niftəliyev bildirib ki, bu cür xidmətlərin yaranması kreativ bir ideyadır və sosial marketinq baxımından maraqlı yanaşmadır. Onun sözlərinə görə, dəbə çevrilən hər bir yenilik kütləvi psixologiyaya və sosial qarşılıqlı təsirə əhəmiyyətli dərəcədə təsir göstərir:
“Burada qeyri-adi və qeyri-ciddi heç nə yoxdur. Sadəcə, kimlərsə həqiqi dostluqla yanaşı, bu atmosferi müəyyən ödənişli xidmət müqabilində daha da canlandırmaq istəyir. Adətən rəqqaslar və maraqlı çıxışlar edənlər bəyin dostu kimi təqdim olunur ki, bu da məclisə kreativlik, yenilik və musiqi ruhu qatır”.
Ekspert qeyd edib ki, toy insanların həyatında bir dəfə baş verən önəmli hadisə olduğu üçün hər kəs onu yaddaqalan etməyə çalışır. Lakin qiymət faktoru məsələnin digər tərəfidir. Bir nəfər üçün 150 manat, 10 nəfərlik qrup üçün isə 1500 manat xidmət haqqı bəziləri üçün sadə cib xərcliyi olsa da, orta təbəqə üçün ciddi maliyyə yükü hesab oluna bilər.
Sosioloq əlavə edib ki, bu bir biznes növüdür və heç kim bu xidmətdən istifadəyə məcbur edilmir: “İnsanlar öz kreativ düşüncələri ilə qanuni şəkildə vergi ödəyərək gəlir qazanırlarsa, bunu yalnız alqışlamaq olar”.
