Yol hərəkəti təhlükəsizliyini bəhanə edərək, vətəndaşların və ya müxtəlif qurumların küçələrdə, hətta yaşayış binalarının həyətlərində özbaşına sürətazaldıcı maneələr (“tramplin”) quraşdırması ciddi qanun pozuntusu hesab olunur.
Gündəm24.az xəbər verir ki, məsələ ilə bağlı mütəxəssislər və rəsmi qurumlar xəbərdarlıq edir ki, bu cür hərəkətlər həm qanunsuzluqdur, həm də inzibati məsuliyyət yaradır.
Nəqliyyat eksperti Eldəniz Cəfərov Baku Tv-yə müsahibəsində bildirib ki, ümumi istifadədə olan yollarda və məhəllədaxili küçələrdə sürətazaldıcı maneələrin quraşdırılması yalnız aidiyyəti dövlət qurumlarının razılığı və iştirakı ilə həyata keçirilə bilər. Ekspert qeyd edib ki, çoxmənzilli binaların həyətlərində vəziyyət bir qədər fərqli olsa da, burada da müəyyən prosedurlar gözlənilməlidir:
“Azərbaycan Respublikasının Mənzil Məcəlləsi sakinlərə öz həyətlərində təhlükəsizlik məqsədilə tramplin, şlaqbaum və digər məhdudlaşdırıcı vasitələr quraşdırmağa imkan verir. Lakin bu, qaydalara riayət edilməsi şərti ilə mümkündür.”
Baş Dövlət Yol Polisi İdarəsinin bölmə rəisi Toğrul Nəsirli isə mövqeyini daha kəskin şəkildə ifadə edib. O, “Yol hərəkəti haqqında” qanunun 11-ci maddəsinə istinad edərək xatırladıb ki, yolların hərəkət hissəsində sədlərin və şlaqbaumların qurulması, nəqliyyat vasitələrinin və piyadaların hərəkətinə maneə yaradılması qəti şəkildə qadağandır.
Bu qaydaları pozan şəxslər İnzibati Xətalar Məcəlləsinin 354-cü maddəsinə əsasən məsuliyyətə cəlb olunurlar.
İcazəsiz şəkildə tramplin və digər maneələrin yerləşdirilməsinə görə tətbiq olunan cərimələr aşağıdakı kimidir:
Fiziki şəxslər: 80 manatdan 100 manatadək;
Vəzifəli şəxslər: 400 manatdan 500 manatadək;
Hüquqi şəxslər: 3 min manatdan 4 min manatadək.
Ekspertlər vurğulayırlar ki, özbaşına quraşdırılmış maneələr həm nəqliyyat vasitələrinə zərər vura, həm də təcili yardım və yanğınsöndürmə maşınlarının vaxtında ünvana çatmasına ciddi əngəl törədə bilər. Buna görə də, hər hansı bir maneənin quraşdırılması üçün mütləq şəkildə müvafiq icra orqanlarından rəsmi icazə alınmalıdır.
