9 May – Qələbə Günü ərəfəsində müharibə iştirakçılarına və veteranlara dövlət tərəfindən pul mükafatlarının verilib-verilməyəcəyi yenidən gündəmə gəlib. Bu məsələ cəmiyyətin müxtəlif təbəqələrində müzakirə olunur.
Bəs bu il də dövlət tərəfindən veteranlara maliyyə dəstəyi göstəriləcəkmi?
Mövzu ilə bağlı KONKRET.az-a açıqlama verən siyasi şərhçi Azər Həsrət bildirib ki, Azərbaycan dövləti İkinci Dünya Müharibəsi ilə bağlı məsələlərdə hər zaman həssas mövqe nümayiş etdirib:
“Azərbaycan heç vaxt bu müharibədə iştirak etmiş insanlara diqqəti əsirgəməyib. Rəsmi məlumatlara görə, həmin dövrdə 600-700 min azərbaycanlı müharibəyə cəlb olunub, onlardan minlərlə insan həyatını itirib. Bu baxımdan dövlət faşizmə qarşı döyüşən şəxsləri daim diqqətdə saxlayır.”
Ekspert qeyd edib ki, hazırda da dövlət tərəfindən müharibə veteranlarına qayğı davam etdirilir və bu istiqamətdə ənənəvi addımların atılması gözləniləndir:
“Bildiyimə görə, cənab prezidentin bununla bağlı sərəncamı mövcuddur. Bu isə o deməkdir ki, qələbəyə töhfə vermiş insanlara dövlət qayğısı bu il də göstəriləcək. Artıq bu müharibəyə baxış dəyişib. SSRİ bizim “böyük vətənimiz” deyildi. Eyni zamanda, qeyd edilməlidir ki, müharibə faktiki olaraq İkinci Dünya Müharibəsinin başa çatması – 2 sentyabr 1945-ci ildə olub. Sadəcə olaraq, SSRİ Berlin əməliyyatı ilə əlaqədar olaraq 9 May tarixini qeyd edirdi.”
Siyasi şərhçi hesab edir ki, Azərbaycan gələcəkdə bu məsələyə yanaşmanı daha da uyğunlaşdırmaq zərurəti ilə üzləşə bilər. Bununla belə, o vurğulayıb ki, istənilən halda veteranlara göstərilən sosial dəstək dövlət siyasətinin prioritet istiqamətlərindən biri olaraq qalır.
