Yaxın Şərqdə cərəyan edən son hadisələr regionun siyasi xəritəsində yeni və təhlükəli bir cəbhənin açıldığını göstərir. İranın uzun illərdir davam edən təcrid olunma prosesi, artıq qonşu ərəb dövlətlərinin açıq şəkildə qarşı tərəfə keçməsi ilə yeni bir müstəviyə qədəm qoyub. Azərbaycanın İrana qarşı münasibəti tarixən mürəkkəb olsa da, rəsmi Bakı hər zaman qarşılıqlı etimada və mehriban qonşuluq prinsiplərinə sadiq qalıb. Hətta beynəlxalq təzyiqlərin ən pik həddində belə Azərbaycan öz ərazisindən İrana qarşı istifadəyə icazə verməyib, humanitar yardımlarını əsirgəməyib və Tehranla diplomatik kanalları daima açıq saxlayıb. Lakin bu gün körfəz ölkələrinin — BƏƏ, Küveyt, Səudiyyə Ərəbistanı, Bəhreyn və Qətərin ABŞ və İsrailin hərbi əməliyyatlarına öz ərazilərindən şərait yaratması bölgədəki tarazlığı tamamilə dəyişib.
Məsələni NOCOMMENT.az-a şərh edən politoloq Məhəmməd Əsədullazadə deyib ki, İranın qonşuları olan körfəz ölkələrinin bu addımı beynəlxalq hüququn və qonşuluq dəyərlərinin birbaşa tapdanmasıdır: “Birmənalı şəkildə körfəz ölkələrinin İrana qarşı fəaliyyəti düşmən hərəkətidir. Qonşular arasında müharibə ola bilər və sabah barışıq mümkündür, necə ki, Azərbaycan və Ermənistan arasında bu prosesi görürük. Lakin körfəz ölkələri İrandan onlara birbaşa hərbi təhdid olmadan bu əməliyyatlara dəstək verdilər. Onlar iddia edirdilər ki, İran mülki obyektləri vurur, halbuki həmin obyektlərdə İsrail və ABŞ hərbçiləri yerləşmişdi. Bu, qonşuluq münasibətlərinə sığmayan bir davranışdır”.
Politoloq qeyd edib ki, kənar güclərin bölgəyə müdaxiləsinə şərait yaratmaq qonşu dövlətin varlığını təhdid altına almaqdır: “Uzaq bir regiondan gələn ölkə sənin qonşunu vurursa və sən ona yardım edirsənsə, artıq sənin qonşu kimi varlığın digəri üçün təhdidə çevrilir. Körfəz ərəb ölkələri öz qonşularına qarşı heç nədən düşmən kimi davranıblar. Biz Ermənistana Rusiya dəstək verəndə kəskin etirazımızı bildirmişdik, halbuki Moskva bunu gizli etməyə çalışırdı və müharibə zamanı məcburi şəkildə neytral qaldı. Biz həmçinin İranın Ermənistanla əməkdaşlığını da sərt tənqid edirik, çünki bu, bizim milli maraqlarımıza toxunur”.
Məhəmməd Əsədullazadənin sözlərinə görə, İrandakı rejimə münasibətdən asılı olmayaraq, qonşu dövlətlərin bu hərəkəti bağışlanmazdır: “İrandakı rejimdən xoşumuz gəlməyə bilər, lakin bu, qonşu dövlətin ərazisindən başqa bir dövlətin hücumuna şərait yaratmağa əsas vermir. Məsələn, əgər Fransa Azərbaycana qarşı gəlib Gürcüstan ərazisindən hücum edirsə, biz Tbilisiyə necə baxmalıyıq? Eyni məntiq burada da keçərlidir. Səudiyyə Ərəbistanı və digər körfəz ölkələri bölgədə gərginliyi azaltmaq əvəzinə, alovun üzərinə yağ tökməklə gələcəkdə özləri üçün də ciddi təhlükəsizlik problemləri yaradırlar”.
