Dünyanın ən maraqlı yaşayış məntəqələrindən birində hər kəsin eyni ünvanı var: eyni ölkə, eyni şəhər, eyni qəsəbə və hətta eyni bina. Bu şəhərdə yaşayan hər kəs tək bir binada toplanıb.
Gündəm24.az Qafqazinfo-ya istinadən xəbər verir ki, burada yaşayan insanlar evlərindən nadir hallarda çıxır, uşaqlar isə məktəbə gedərkən binaya qoşulmuş yeraltı tunellərdən istifadə edirlər.
Bu şəhərdə səhər pijamanızla liftə minirsiniz, iki mərtəbə aşağıda yerləşən tərəvəz dükanından alış-veriş edirsiniz, aşağıdakı mərtəbədə meri qarşılayırsınız və sonra metrodan keçərək işə gedirsiniz — bütün bunlar binanın daxilində baş verir. Bütün bunlar baş verərkən, çöldə şaxtalı fırtına və metrlərlə qar var. Bu, elmi fantastika filmi deyil, Alyaskanın ən maraqlı şəhəri Uittierdir.
Uittier sakinlərinin, demək olar ki, hamısı Begic Qüllələri adlı 14 mərtəbəli nəhəng binada yaşayır. Soyuq Müharibə dövründə hərbi kazarma kimi tikilmiş bu bina bu gün şəhərin bütün orqanlarını birləşdirir. Burada təkcə mənzillər deyil, həm də polis bölməsi,klinika, bazar, poçt şöbəsi və hətta kilsə yerləşir. Sakinlər üçün “çölə çıxmaq” çox vaxt sadəcə dəhlizə çıxmaq deməkdir — burada heç kim evindən çıxmır.
Bu “şaquli həyat”ın əsas səbəbi təbiətin sərt üzüdür. Uittier Alyaskanın ən qarlı və küləkli bölgələrindən biridir. Qış aylarında qarın qalınlığı 7 metrə çata bilər, külək saatda 100 km sürətlə əsir. Bu şəraitdə binalar arasında ənənəvi nəqliyyat mümkün olmadığından sakinlər bütün fəaliyyətlərini tək bir dam altında birləşdirməyə qərar veriblər.
Şəhərin uşaqları da bu maraqlı sistemin bir hissəsidir. Məktəbə gedərkən çöldə donmaq riski olmadan binaya qoşulmuş yeraltı tunellərdən istifadə edirlər. Beləliklə, uşaq bütün qış boyunca açıq havaya çıxmadan evdən məktəbə gedib-gələ bilir.
Uittierə avtomobillə çatmaq özü bir sərgüzəştdir. Şəhərə gedən yeganə yol təxminən 4 kilometr uzunluğunda dar bir tuneldən keçir. Tunel həm qatarlar, həm də avtomobillər üçün istifadə olunur və hər yarım saatda hərəkət istiqaməti dəyişir. Gecikənlər tunelin digər tərəfində maşınlarında gecələməli olurlar.
