Ermənistan Konstitusiya Məhkəməsi iyunun 7-də keçirilən parlament seçkilərinin nəticələrinin etibarsız sayılması tələbi ilə təqdim olunan yeddi siyasi qüvvənin iddialarının icraatına başlayıb.
Gündəm24.az xəbər verir ki, məhkəmənin yaydığı məlumata görə, bütün müraciətlər eyni məsələ ilə bağlı olduğundan bir icraatda birləşdirilib.
Birləşdirilən iş üzrə məhkəmə iclası iyunun 26-da yerli vaxtla saat 11:00-da keçiriləcək. İş üzrə məruzəçi hakim Edqar Şatiryan təyin edilib və dinləmələr şifahi qaydada aparılacaq.
İyunun 19-da “Güclü Ermənistan”, “Çiçəklənən Ermənistan”, “Ermənistan”, “Birlik Qanadları”, “Demokratiya, Qanun, Nizam”, “Respublika naminə Demokratiya Müdafiəçiləri İttifaqı” və “Yeni Güc” siyasi birlikləri Konstitusiya Məhkəməsinə müraciət edərək seçkilərin nəticələrinin ləğvini tələb ediblər.
İyunun 7-də keçirilən parlament seçkilərinin rəsmi nəticələrinə əsasən, Ermənistan Milli Məclisinə üç siyasi qüvvə keçib. Hakim
“Vətəndaş Müqaviləsi” Partiyası səslərin 49,75 faizini (726 min 819 səs) toplayaraq birinci olub. “Güclü Ermənistan” bloku 23,27 faiz (340 min 60 səs), “Ermənistan” bloku isə 9,92 faiz (144 min 983 səs) səs qazanıb.
Seçkilər zamanı parlamentə düşmək şansı olan “Çiçəklənən Ermənistan” Partiyası isə Mərkəzi Seçki Komissiyasının açıqladığı nəticələrə görə 3,99 faiz (58 min 287 səs) toplayaraq qanunla müəyyən edilmiş 4 faizlik seçki baryerini keçə bilməyib.
Partiya seçkilərin nəticələrini qəbul etmədiyini və MSK-nın rəqəmlərinin “saxtalaşdırıldığını” bəyan edib.
Yeni parlamentdə “Vətəndaş Müqaviləsi” 64, “Güclü Ermənistan” 29, “Ermənistan” bloku isə 12 mandat əldə edib.
Beləliklə, hakim siyasi qüvvə parlament çoxluğunu qoruyub saxlasa da, Konstitusiyaya birtərəfli dəyişiklik etmək üçün tələb olunan konstitusion çoxluğu əldə edə bilməyib.//KONKRET.az
