İsrailin Baş naziri Benyamin Netanyahu İranın ali dini lideri Müctəba Xameneinin sağ olduğunu və bunkerlərdən birində gizləndiyini iddia edib.
Netanyahu bildirib ki, Xameneinin hazırkı vəziyyəti ilə bağlı dəqiq məlumat yoxdur:
“Onun hansı vəziyyətdə olduğunu demək çətindir. Hansısa bunkerdə və ya qapalı məkanda gizlənib. Düşünürəm ki, hakimiyyətini möhkəmləndirməyə çalışır. Məncə, o, atası Ayətullah Xamenei qədər nüfuza malik deyil. Bu isə rejim daxilində parçalanma yaradır və bu, yaxşı haldır”.
KONKRET.az xəbər verir ki, bir neçə gün əvvəl İran rəsmilərindən biri Tasnim agentliyinə açıqlamasında Müctəba Xameneinin aldığı xəsarətlərdən tam sağaldığını və “səhhətinin yaxşı olduğunu” bildirib.
Bundan əvvəl isə CNN ABŞ kəşfiyyat məlumatlarına istinadən xəbər vermişdi ki, Xamenei yaralansa da, İranın hərbi strategiyasının formalaşdırılmasında mühüm rol oynamaqda davam edir.
Məlumatlara görə, o, həmçinin İranın ABŞ ilə müharibənin dayandırılması istiqamətində apardığı danışıqlara da təsir göstərir.
ABŞ kəşfiyyatı hələ də Xameneinin dəqiq yerini müəyyən edə bilməyib. Bildirilir ki, o, təhlükəsizlik səbəbindən elektron rabitə vasitələrindən istifadə etmir və yalnız şəxsən görüşən insanlar və ya kuryerlər vasitəsilə əlaqə saxlayır.
Telekanalın mənbələrinin sözlərinə görə, Xamenei bədəninin bir hissəsində ağır yanıq xəsarətləri aldığı üçün gizlənmək məcburiyyətində qalıb.
