Ukraynanın Zaporojye AES-in xarici elektrik mənbəyi ilə əlaqəsi tamamilə kəsilib.
Gündəm24.az NOCOMMENT.az-a istinadən xəbər verir ki, bu barədə Atom Enerjisi üzrə Beynəlxalq Agentliyi (AEBA) rəsmi bəyanat yayıb.
Məlumata əsasən, bu gün səhər saatlarında stansiyanı qidalandıran sonuncu xarici elektrik xətti də sıradan çıxıb. Hazırda obyektin təhlükəsizlik sistemlərinin fəaliyyətini təmin etmək məqsədilə ehtiyat dizel generatorları işə salınıb.
AEBA-nın baş direktoru Rafael Qrossi hadisə ilə bağlı ciddi xəbərdarlıq edərək bildirib ki, xarici enerji təchizatının mütəmadi olaraq kəsilməsi münaqişə zonasında yerləşən stansiyanın nüvə təhlükəsizliyi üçün böyük risk yaradır. Hazırda agentliyin obyektdəki monitorinq qrupu vəziyyəti yaxından izləyir.
