Karib dənizi ölkəsi olan Dominikan Respublikası ABŞ-dan deportasiya ediləcək “üçüncü dünya ölkələri”nin bəzi vətəndaşlarını qəbul edəcəyini açıqlayıb.
Gündəm24.az xəbər verir ki, “New York Times” qəzetinin məlumatına görə, Dominikan Respublikası ABŞ-dan deportasiya olunan bəzi qanunsuz miqrantları qəbul etməyə razılaşan növbəti Latın Amerikası ölkəsinə çevrilib. Xarici İşlər Nazirliyinin açıqlamasına görə, Vaşinqtonla imzalanmış “qeyri-məcburi anlaşma memorandumu” çərçivəsində müəyyən kateqoriyaya aid miqrantlar ölkəyə göndərilə biləcək.
Razılaşmaya əsasən, cinayət keçmişi olan şəxslər, müşayiət olunmayan azyaşlılar və Haitidən olan miqrantlar bu prosesə daxil edilməyəcək. ABŞ tərəfindən Dominikan Respublikasına göndərilən şəxslər “üçüncü ölkə vətəndaşları” hesab olunacaq və onların ölkədə qalması yalnız tranzit xarakter daşıyacaq.
Məlumata görə, göndəriləcək miqrantların sayı məhdud olacaq. Həmçinin həmin şəxslərin Dominikan Respublikasında olduqları müddətdə və öz ölkələrinə geri qaytarılması prosesində bütün maliyyə və əməliyyat dəstəyi ABŞ tərəfindən təmin ediləcək.
Dominikan Respublikasının Vaşinqtondakı keçmiş səfiri Bernardo Vega isə razılaşmanı sərt tənqid edib. O bildirib ki, bu addım ABŞ-ın ölkəyə təzyiq göstərdiyini nümayiş etdirir və vəziyyət “pis xəbər” kimi qiymətləndirilməlidir. ABŞ-ın El Salvador, Panama və Kosta Rika kimi ölkələrə də miqrant deportasiya etməsi həmin dövlətlərdə ciddi hüquqi və siyasi müzakirələrə səbəb olmuşdu.
Sədaqət Həsənova
Gündəm24.az
