Rusiyanın xarici işlər naziri Sergey Lavrov ABŞ-ın Alyaska ştatında keçirilən sammit zamanı üzərində “SSRİ” yazısı olan sviterlə görünməsinə aydınlıq gətirib.

Gündəm24.az xəbər verir ki, Lavrovun sözlərinə görə, bu, Sovet İttifaqını bərpa etmək niyyəti ilə bağlı deyil:

“Biz Sovet İttifaqında doğulmuşuq. Rusiya prezidenti Vladimir Putin dəfələrlə deyib ki, kim SSRİ-nin dağılmasına görə təəssüflənmirsə, onun ürəyi yoxdur. Amma kim onun bərpasını istəyirsə, onun başı yoxdur. Bu, tamamilə doğru fikirdir”.

Nazir vurğulayıb ki, SSRİ yazısı onun şəxsi kökləri və xatirələri ilə bağlıdır:

“Əgər insan öz köklərini, uşaqlığını, gəncliyini, ilk məhəbbətini, dostlarını xatırlamırsa, deməli, bəşəriyyəti və insan dəyərlərini də anlamır.

Həyatının uzun illərində baş verənləri yadında saxlamaq və onları qiymətləndirmək bir şeydir, amma hər yeri hərbi yolla ələ keçirməyə çalışmaq tamamilə başqa şeydir. Bunları qarışdırmaq olmaz”.

Mövlam RZALI,
Gündəm24.az

Oxunub: 4