Rusiya Federal Təhlükəsizlik Xidməti (FSB) Sankt-Peterburqda Ukrayna kəşfiyyat xidmətlərinin əmri ilə planlaşdırılan və Rusiya Müdafiə Nazirliyinin yüksək vəzifəli məmurunu hədəf alan terror aktının qarşısını aldığını açıqladı.
Gündəm24.az xəbər verir ki, FSB İctimaiyyətlə Əlaqələr Mərkəzinin açıqlamasına görə, Ukrayna kəşfiyyat xidmətlərinin təlimatları ilə hərəkət edən iki Rusiya vətəndaşı tərəfindən Sankt-Peterburqda planlaşdırılan terror aktının qarşısı alınıb. Bildirilib ki, hücumun hədəfi Rusiya Müdafiə Nazirliyinin yüksək vəzifəli məmurlarından biri olub.
Açıqlamada qeyd edilib ki, terror aktını həyata keçirməyi planlaşdıran şəxslərin qanunsuz fəaliyyəti vaxtında aşkarlanaraq dayandırılıb. Saxlanılan şübhəlilər Ukrayna kəşfiyyat strukturları ilə Telegram vasitəsilə əlaqə saxladıqlarını, hücumu törətməyə hazır olduqlarını, hədəfin ünvanını müəyyən etdiklərini və partlayıcı maddəni gizləndiyi yerdən çıxardıqlarını etiraf ediblər.
Məlumata görə, partlayıcı qurğu zabitin avtomobilinin altına yerləşdirilib. FSB əməkdaşları tərəfindən keçirilən əməliyyat zamanı bomba tapılaraq zərərsizləşdirilib. Faktla bağlı araşdırma tədbirləri davam etdirilir.
Sədaqət Həsənova
